JUDAS
by Marion Montgomery
Whit wey cuid ye no dae Yer ain dirty work?
Ony day this week they cuid hae taen him.
Easy. Broad daylicht. The wan on yon daft cuddy.
But naw. Ye had tae get a man involved.
Jist tae keep the Books richt.
Reddin up the Temple, flytin and flayin
Capitalists and cheats - yon wis braw.
But yon loose wumman wastin oil.
Palm leaves. And him ower thrang wi James and John.
I’m scunnered wi sic goings-on
Even tae keep the Books richt.
Noo Pilate disnae ken his mind - but I’m
No let change mine He’ll keep his haunds clean
While I’ve a mill-stane roond my neck.
Syne I’ll go hang and see Yer son in hell.
That’ll keep the Books richt.